काठमाण्डौं उपत्यकामा निषेधाज्ञा धेरै खुकुलो, सबै सवारी साधन चल्न पाउने (हेर्नुहोस विस्तृत जानकारी)

प्रकाशित मिति : २० असार २०७८, आइतबार

कोरोनाभाइरस महामारी नियन्त्रणका लागि काठमाण्डौं उपत्यकामा लागु गरिएको निषेधाज्ञा थप विभिन्न क्षेत्रलाई खुला गर्दै असार ३१ गतेसम्म बढाइएको छ ।
आइतवार बसेको उपत्यकाका प्रमुख जिल्ला अधिकारीहरूको बैठकले निषेधाज्ञाका प्रावधानहरूलाई पहिलेकोभन्दा धेरै नै खुकुलो बनाउँदै त्यसलाई एक साता बढाउने निणर्य गरेको हो ।
नयाँ नियम सहितको निषेधाज्ञा आगामी मङ्गलवारबाट लागु हुनेछ । नयाँ निणर्यसँगै अब उपत्यकामा सवारीसाधनमा लागेको जोरबिजोर प्रणाली हटेको छ ।
योसँगै सार्वजनिक यातायातका टेम्पो तथा निलो माइक्रोमा ९ जनाभन्दा यात्रु नबढ्ने गरी सञ्चालन गर्न पाइनेछ । बसका हकमा भने कुल स्वीकृत सीट क्षमताभन्दा बढी यात्रु राख्न पाइने छैन ।
त्यस्तै विभिन्न निकायबाट पूर्वनिर्धारित लिखित र प्रयोगात्मक परीक्षणाहरू सीमित संख्यामा परीक्षार्थी राखेर सञ्चालन गर्न पाइने भएको छ ।
परीक्षा सञ्चालन हुने कुनै एक स्थान हल तथा कोठाको आकार अनुसार २५ जना भन्दा बढी मानिसहरू भेला जम्मा नहुने गरी परीक्षा सञ्चालन गर्न पाउने भएको छ ।
नयाँ व्यवस्था अनुसार औषधि र स्वास्थ्य सामग्रीसम्बन्धी पसलहरू जुनसुकै बेला सञ्चालन गर्न सकिने छ भने त्यस बाहेकका अन्य व्यवसाय साँझ ६ बजेसम्म खोल्न सकिने व्यवस्था गरिएको छ ।
यसैगरी रेस्टुराँ लगायतबाट प्रदान हुने ‘टेक अवे’ र होम डेलिभरी सेवा भने साँझ ७ बजेसम्म चलाउन पाइनेछ ।
नयाँ नियम अनुसार अत्यावश्यक कामले काठमाण्डौं उपत्यका प्रवेश गर्ने सार्वजनिक तथा निजी सवारीसाधनको हकमा सम्बन्धित जिप्रकाबाट स्वीकृति लिएर प्रवेश पाउने व्यवस्था गरिएको छ ।

यी गतिविधि निषेध गरिएका छन् :

• सबै प्रकारका सभासम्मेलन र तालिम वा सेमिनारहरू
  
• सिनेमा हल, पार्टी प्यालेस, डान्सबार, दोहोरी, नाचघर, क्लबहरू
  
• स्वीमिङ पुल, मनोरञ्जलन स्थल, सैलुन, ब्युटिपार्लरहरू
  
• हेल्थक्लब, फुटसल, जिमखाना, पुस्तकालाय, संग्रहालय, चिडयाँखाना, रङ्गशालामा दर्शकसहित हुने खेलकुद
  
• खुला स्थानमा मानिसहरू भेला हुने सभासम्मेलन, जुलुस र भोजभतेरहरू
  
• होटल र पार्टी प्यालेसमा हुने विवाह, व्रतबन्ध र सामूहिक सांस्कृतिक कार्यक्रमहरू
  
• पुजारीबाट हुने नित्य पूजाबाहेक अन्य धार्मिक गतिविधिहरू
  
• शैक्षिक संस्थाहरूमा भौतिक उपस्थितिमा पठनपाठन गर्न नपाइने

अब स्थानीय ढुवानी सेवा बिहान ९ बजेदेखि ११ बजेसम्म र अपराह्ण ४ बजेदेखि ७ बजेसम्म सञ्चालन गर्न पाइनेछ । जिप्रकाहरूबाट जारी आदेशमा चलाउन दिइने व्यवसाय र सेवाका हकमा पनि भौतिक दूरी कामय राख्ने र स्वास्थ्य मापदण्ड पालन गर्नुपर्ने उल्लेख छ । त्यस्तै मास्क नलगाउनेलाई सार्वजनिक यातायातमा प्रवेश नदिने र चालक तथा सहचालकले मास्क, भाइजर र पञ्जा अनिवार्य लगाउनुपर्ने व्यवस्था छ । सवारीसाधनको अनिवार्य रूपमा दैनिक निसंक्रमण गर्नुपर्नेछ । तालिम, गोष्ठी, सेमिनार, बैठक, समीक्षा प्रशिक्षणलगायत प्रत्यक्ष रूपमा गर्नै पर्ने भएमा भौतिक दूरी कामय गर्दै स्वास्थ्य मापदण्ड अपनाएर २५ जना मात्र सहभागी भइ गर्न सकिने पनि आदेशमा उल्लेख छ ।