निष्कर्षविहिन बन्यो नेकपा सचिवालय बैठक

प्रकाशित मिति : १६ मंसिर २०७७, मंगलबार

काठमाडौं । सत्तारुढ नेकपाको सचिवालयको मंगलबार बसेको बैठक निष्कर्षविहिन भएको छ । बैठक बुधबार पुनः बस्ने बताइएको छ ।
पार्टी केन्द्रीय कार्यालय धुम्बाराहीमा प्रधानमन्त्रीलाई सुरक्षा जोखिम भएको भन्दै सचिवालय बैठक प्रधानमन्त्रीको सरकारी निवास बालुवाटारमा बसेको थियो । मंगलबार प्रधानमन्त्रीको सरकारी निवास बालुवाटारमा बसेको बैठकमा दुवै अध्यक्षका प्रस्तावमाथि छलफल सुरुवात भएकाले बुधबार फेरि बालुवाटारमै बैठक बस्ने प्रवक्ता नारायणकाजी श्रेष्ठले जानकारी दिएका छन् ।
बैठकमा कात्तिक २८ मा कार्यकारी अध्यक्ष पुष्पकमल दाहालले पेस गरेको प्रस्ताव र त्यसको जवाफमा मंसिर १३ गते प्रधानमन्त्री एवं अध्यक्ष केपी शर्मा ओलीले पेस गरेको प्रस्तावमाथि नेताहरुले आफ्ना धारणा राखेका थिए ।
प्रवक्ता श्रेष्ठले दुवै प्रस्तावमाथि औपचारिक रुपमा छलफल पनि गर्ने र नेताहरुबीच अनौपचारिक संवादलाई पनि निरन्तरता दिने निष्कर्ष बैठकले निकालेको बताएका छन् ।