‘राजावादीसँग ओलीकै मिलोमतो’
काठमाडौं । देशका विभिन्न शहरमा भएका राजावादीका प्रदर्शनमा कतै वर्तमान सरकारको नेतृत्व गरिरहेका प्रधानमन्त्री केपी शर्मा ओलीकै त मिलोमतो हो कि भन्ने आशंका विपक्षी पार्टी तथा राजनीतिक विश्लेषकहरुले गर्न थालेका छन् ।
सोमबार पूर्वप्रधानमन्त्री एवं नेपाली कांग्रेसका सभापति शेरबहादुर देउवाले पनि यस्तै आशंका प्रकट गरेका छन् । सरकारविरुद्ध हेटौडामा आयोजित विरोध कार्यक्रमलाई सम्बोधन गर्दै देउवाले राजावादी आन्दोलनका लागि ओली सरकार नै जिम्मेवार रहेको बताएका हुन् ।
हिजो आइतबार प्रदेश १ का आर्थिक मामिला मन्त्री इन्द्र आङ्बोहाङले पनि सडकमा राजावादीहरू आउनुमा प्रधानमन्त्री केपी शर्मा ओलीकै हात रहेको आरोप लगाएका थिए । झापाको दमकमा प्रदेशस्तरीय अनेरास्ववियुको भेलालाई सम्बोधन गर्दै मन्त्री आङ्बोहाङले यस्तो आरोप लगाएका हुन् ।
