‘सिंहदरबारबाट आएको अध्यादेश बजेटको कार्यान्वयन गर्न कठिन’

प्रकाशित मिति : १६ जेष्ठ २०७८, आइतबार

काठमाडौं । सरकारले हालै ल्याएको अध्यादेश बजेटलाई पूर्वअर्थमन्त्री सुरेन्द्र पाण्डेले ‘हार्डवेयरभन्दा बढी सफ्टवेयर’ भएको बताएका छन् । पूर्वअर्थमन्त्री पाण्डेकै शब्दमा साधारण खर्च बढाउने खालका कार्यक्रम धेरै ल्याइएको बताएका छन् ।
कोभिडलाई केन्द्रित गरेर राहत दिने कुरा आउनु सकारात्मक भए पनि राजस्व स्थिर रहने र ऋण बढ्ने अवस्था देखा पर्नु चिन्ताको विषय भएको पाण्डेले बताएका छन् । उनी आगामी वर्ष पुँजीगत खर्च कार्यान्वयन नहुने जोखिम रहेको बताउँछन् ।
पूर्वअर्थमन्त्री सुरेन्द्र पाण्डेले यसो भनेका छन् :

दुई कारणले पुँजीगत खर्चमा जोखिम छ । एउटा कोभिडको अवस्था छ र अर्को चुनावको वर्ष भनेर राष्ट्रिय राजनीति अस्थिर छ । चुनाव हुने भनेपछि कर्मचारी प्रशासनले भोलि को आउँछ भनेर मन लगाएर काम गर्दैन । त्यसैले कार्यान्वयन गाह्रो छ ।