मुख्य मन्त्रीलाई महंगो मोटर मोह !

प्रकाशित मिति : २४ श्रावण २०७६, शुक्रबार

मिडिया क्लब नेपाल । पोखरा

मुख्य मन्त्री गुरुङ भन्छन् – थोत्रो गाडी दिएर अपमान गरेकाले २ करोड ५० लाखको ल्यान्डक्रुजर किनें

नेपालमा संघीयता आएपछि समृद्धि नेपाल बन्छ भन्ने आशा थियो, यो आशा अहिले नेताहरुको गलत कार्यशैलीले मर्दै गएको छ । जनताको प्रतिनीधित्व गरेर आएका तीनै तहका जनप्रतिनीधिहरुको सामन्ती र सङ्किर्ण सोचका कारण जनताको नजरबाट संघीयता र सरकारमाथि अविश्वास बढ्दै गएको छ, देशको अर्थतन्त्र पनि धराशायी बन्दै गएको छ ।
गण्डकी प्रदेशकै कैयौं दुर्गम गाऊँमा अmझैसम्म पनि जनता सामान्य सिटामोल नपाएर मरिरहेका छन् । यता संघीयताका हिमायती भनिएकाहरू महंगो मोटर चढ्न पाईन भनेर रुवाबासी गर्दैछन् ।

गत आर्थिक वर्षमा गाडी खरिदको होडमा अन्य प्रदेशभन्दा गण्डकी पछाडि रह्यो तर सबैभन्दा महंगो गाडी चढ्नेमा चाहिँ मुख्यमन्त्री गण्डकी प्रदेशका पृथ्वीसुब्बा गुरुङ नै सबैभन्दा अगाडि रहे । मुख्यमन्त्री पृथ्वीसुब्बा करिब २ करोड ५० लाखको गाडीे चढ्छन् । गुरुङ मुख्यमन्त्री भएपछि प्रदेश सरकारले ल्यान्डक्रुजर किनेको हो ।
प्रदेश सरकारका मन्त्रीहरु सुविधाभोगी बनेको भन्दै धेरैले आलोचना गरेका छन् भने कतिले त संघीयतामाथि नै प्रश्न उठाएका छन् । तर उता मुख्यमन्त्री गुरुङ भन्छन् – ‘केन्द्रमा बस्नेहरुले अपमानजनक व्यवहार गरेकाले महंगो गाडी किनेको हुँ ।’
काठमाडौं जाँदा केन्द्रमा बस्नेहरुले अपमानजनक व्यवहार गरेको बताउने मुख्यमन्त्री गुरुङको घटना चाहिँ यस्तो रहेछ (उनकै शब्दमा) –
“प्रधानमन्त्रीको नेतृत्वमा बस्ने बैठकमा भाग लिन पोखराबाट काठमाडौं गएँ । एयरपोर्टबाट गौशला हुँदै जाँदै थिएँ । गौशला नुपग्दै गाडी बन्द भयो । गौशालाको प्रहरी कार्यालयमा मैले चिनेको एक जना डीएसपी थिए । उनलाई बोलाएर, उनैले पिकप गरिदिएर म बैठकमा पुगें । यस्तो अपमानजनक व्यवहार भएपछि म चाहिँ यीनीहरूकै सामु ल्यान्डक्रुजर गाडी चढेर आउँछु भनेर मैले चढेको हो । नत्र मलाई ल्यान्डक्रुजर, प्राडो चढ्ने इच्छा थिएन ।”
मुख्यमन्त्री गुरुङले काठमाडौं जाँदा ३ जना पनि नअट्ने थोत्रो गाडी दिने गरेको गुनासो गर्दै भने – ‘हामी जाँदा जहिले पनि राष्ट्रिय झन्डा नभएको सानो, थोत्रो गाडी दिने । यसरी अपमानकै कारण ल्यान्डक्रुजर किनेँ ।’

संघमा बस्नेको धेरै मोजमस्ती गरेको गुरुङको आरोप

प्रदेश सरकारका मन्त्रीहरु सुविधाभोगी भन्नु पूर्वाग्रहमात्रै भएको बताउने मुख्यमन्त्री गुरुङले प्रदेशका मन्त्रीहरुको कार्यालय र आवास समेत व्यवस्थित नरहेको भन्दै उनले संघ सरकारमा बस्नेहरूले गरेको मोजमस्ती कसैले नदेखेको गुनासो समेत गरेका छन् ।