काभ्रेको पाँचखाल फेदीमा पहिरोले पुरिएर बालकको मृत्यु

प्रकाशित मिति : १ आश्विन २०७६, बुधबार

काभ्रे । काभ्रेपलाञ्चोकको पाँचखाल नगरपालिका–४ फेदी फलिटबोटमा रहेको एउटा घर पहिरोले पुरिंदा एक बालकको मृत्यु भएको छ ।

बिहान ६ बजे घरमाथिबाट पहिरो खस्दा पुरिएर मण्डन देउपुर नपा–११ जैसिथोकका तेजबहादुर तामाङका चार वर्षीय छोरा दिपेशको मृत्यु भएको हो । बालकको बुबा बाहिर निस्केको र आमा शौचालय गएको बेला पहिरो खसेर घर पुरिएको त्यहाँका स्थानीयले बताएका छन् ।
घटनालगत्तै स्काभेटरको सहायताले स्थानीय तथा सुरक्षाकर्मीले पसलभित्र फसेका बालकको खोजी गरेका थिए । बिहान ७ बजेदेखि पहिरो पन्छाउँदा ११ बजे बालकको शव फेला परेको थियो ।