लकडाउन अवधीमा ६.१ प्रतिशतले घट्यो रेमिट्यान्स

प्रकाशित मिति : २ असार २०७७, मंगलबार

मिडिया क्लब नेपाल, काठमाडौं । चालु आर्थिक वर्षको १० महिनामा विप्रेषण आप्रवाह ६.१ प्रतिशतले घटेको छ । यसै अवधिमा ६ खर्ब ८० अर्ब रुपैयाँ रेमिट्यान्स भित्रिएको छ ।

अघिल्लो वर्षको सोही अवधिमा विप्रेषण आप्रवाह १९.६ प्रतिशतले बढेको थियो । कोभिड–१९ ले विश्वस्तरमै असर गर्दा वैदेशिक रोजगारीमा गएका नेपालीले पठाउने रेमिट्यान्सको वृद्धिदर ऋणात्मक देखिएको हो ।
अमेरिकी डलरमा विप्रेषण आप्रवाह ७.४ प्रतिशतले घटेको हो । अघिल्लो आर्थिक वर्षमा यस्तो आप्रवाह ९.३ प्रतिशतले बढेको थियो ।
समिक्षा अवधिमा वैदेशिक रोजगारीका लागि अन्तिम श्रम स्वीकृति लिने नेपालीको संख्या २.७ प्रतिशतले घटेको छ । अघिल्लो वर्षको सोही अवधिमा यस्तो संख्या ३६।८ प्रतिशतले घटेको थियो। वैदेशिक रोजगारीका लागि पुनः श्रम स्वीकृति लिने नेपालीको संख्या समिक्षा अवधिमा २४।६ प्रतिशतले घटेको छ। अघिल्लो वर्षको सोही अवधिमा यस्तो संख्या ५.८ प्रतिशतले बढेको थियो ।
समिक्षा अवधिमा खुद ट्रान्सफर आयमा ६.५ प्रतिशतले कमी आई ७ खर्ब ७२ अर्ब कायम भएको छ । अघिल्लो वर्षको सोही अवधिमा यस्तो आय १९.४ प्रतिशतले बढेको थियो। लकडाउन सुरु हुनुभन्दा अगाडि नेपालमा ८ खर्ब ९२ अर्ब रुपैया रेमिट्यान्स भित्रिएको थियो । नेपालमा पूर्ण लकडाउनकै अवधिमा ८८ खर्ब रुपैयाँ रेमिट्यान्स भित्रिएको हो ।