बुहारीको हत्या गर्ने जेठाजु पक्राउ

प्रकाशित मिति : १८ भाद्र २०७७, बिहिबार

मिडिया क्लब नेपाल, काभ्रे । बुहारीलाई बञ्चरो प्रहार गरी हत्या गर्ने जेठाजुलाई काभ्रे प्रहरीले पक्राउ गरेको छ । काभ्रेको नमोबुद्ध नगरपालिका–८ दाप्चा बजार नजिकै घरमा रहेकी बुहारीलाई धरिलो हतियार बन्चरो प्रहार गर्ने जेठाजुलाई पक्राउ गरेको हो ।
बिहीबार बिहान ३५ वर्षीया रन्जना तिमल्सिना अधिकारीलाई धरिलो हतियार प्रहार गरी जेठाजु सुदर्शन अधिकारीले हत्या गरेको आरोपमा पक्राउ गरिएको जिल्ला प्रहरी कार्यालय काभ्रेले जनाएको छ ।

सुदर्शन अधिकारीले आँगनमा भाडा माझिरहेको बेला रञ्जनालाई पछाडिबाट बन्चरो प्रहार गरेका थिए । बन्चरो प्रहारबाट रन्जनाको घटनास्थलमै मृत्यु भएको जिल्ला प्रहरी कार्यालय, काभ्रेका प्रमुख रविराज पौडेलले बताए ।
घरायसी झै–झगडाको कारण रन्जनाको हत्या भएको प्रहरीको प्रारम्भिक अनुसनधानबाट खुलेको पनि पौडेलले बताएका छन् ।