पर्यटन क्षेत्रको डेढ खर्ब लगानी जोखिममा

प्रकाशित मिति : २३ भाद्र २०७७, मंगलबार

मिडिया क्लब नेपाल, काठमाडौं । कोभिड–१९ का कारण नेपालको पर्यटन क्षेत्रका डेढ खर्बभन्दा बढी लगानी जोखिममा परेको बताइन्छ ।

नेपाल पर्यटन बोर्डले तयार गरेको कोभिड–१९ पछिको पर्यटन क्षेत्रको असरसम्बन्धी अध्ययनअनुसार कानुनी रुपमा सञ्चालन भएका पर्यटन क्षेत्रमा १ खर्ब ५३ अर्ब रूपैयाँको लगानी छ । यो निजी क्षेत्रको मात्रै लगानी हो । यस्तो लगानी पर्यटन क्षेत्रका होटल, एयरलाइन्स, रेष्टुराँदेखि पदयात्रा पर्वतारोहणका साथै जलयात्रालगायत छन् । कोभिड–१९ को मख्य प्रभाव पर्यटन क्षेत्रमा परेको छ । यो क्षेत्रमा २ लाख ७३ हजारले प्रत्यक्ष रोजगारी पाएका छन् ।

संयुक्त राष्ट्र सङ्घ, विश्व पर्यटन सङ्घले नेपालको पर्यटन क्षेत्रमा १० लाखभन्दा बढीले रोजगारी पाएको उल्लेख गरेको छ । त्यस्तै सरकारी तथ्याङ्कले पनि पर्यटन क्षेत्रमा ६ लाख हाराहारीले रोजगारी पाएको विवरण छ । बोर्डले हालै गरेको द्रुत अध्ययनबाट झण्डै तीन लाखले पर्यटन क्षेत्रमा प्रत्यक्ष रुपमा रोजगारी पाएको उल्लेख गरेको छ । सरकारले कोभिड–१९ का कारण थला परेको पर्यटन क्षेत्रलाई राहत एवं पुर्नरुत्थानका लागि चालु आवको बजेटमा १ खर्ब रूपैयाँको पुर्नरुत्थान कर्जाका साथै ५० अर्ब रूपैयाँको पुर्नरुत्थान कोषको व्यवस्था गरेको छ ।