रणनीतिक प्रतिस्पर्धामा उत्रिए भारत र चिन

प्रकाशित मिति : १० मंसिर २०७७, बुधबार

काठमाडौं । नेपालमा हालै भारत र चीनबीचको रस्साकस्सी बढिरहेको छ । हाल सामरिक प्रतिस्पर्धा बढ्दै गएको भन्दै विज्ञहरूले दीर्घकालीन परिस्थिति आँकलन गरेर कूटनीति सञ्चालन गरिनुपर्नेमा जोड दिएका छन् ।

‘रअ’ भनिने भारतको खुफिया निकायका प्रमुख र स्थल सेनाध्यक्षले नेपाल आएर प्रधानमन्त्री सहित उच्च अधिकारीहरूसँग भेटेपछि गएको जनवरीमा भारतको विदेश सचिवको जिम्मेवारी सम्हालेका हर्षवद्र्धन श्रृंगला आफ्नो पहिलो भ्रमणमा काठमाडौं आउने भएका हुन् ।

श्रृंगला दुई दिने भ्रमणबाट फर्किएको ४८ घण्टा नबित्दै उपप्रधानमन्त्रीको हैसियतका चिनियाँ रक्षामन्त्री वेइ फेंग्हे एक दिने भ्रमणमा आइपुग्ने अधिकारीहरूले जानकारी दिएका छन् ।
चिनियाँ रक्षामन्त्रीको भ्रमणको एजेण्डा नखुलाइएको भएपनि परराष्ट्र मामिलाका विज्ञहरूले यसलाई नेपालमा बढिरहेको भूराजनीतिक प्रतिस्पर्धासँग जोडेर हेर्नुपर्ने बताएका छन् ।