जापान सागरमा अमेरिकी जलसेनाको जहाज ध्वस्त पारिदिने रुसको चेतावनी
एजेन्सी । जापान सागरस्थित रुसी जलक्षेत्रमा प्रवेश गरेको अमेरिकी जलसेनाको एउटा विध्वंसक जहाजलाई आफ्नो युद्धपोतले मङ्गलवार लखेटेको दाबी रुसले गरेको छ ।
आफ्नो जलक्षेत्रमा छिर्ने ‘यूसएसएस जोन एस मक्केन’ नामक उक्त जहाजलाई ध्वस्त पारिदिने चेतावनी दिइएको रुसले जनाएको छ ।
रुसका अनुसार उक्त जहाज पिटर द ग्रेट गल्फको जलक्षेत्रमा दुई किलोमिटर भित्र आएको थियो ।
तर अमेरिकी जलसेनाले रुसी आरोपको खण्डन गर्दै आफ्नो पक्षबाट कुनै गल्ती नभएको बताएको छ । अमेरिकाका अनुसार अमेरिकी जहाज कहीँबाट पनि निष्काशित भएको छैन ।
जापान सागरको सीमामा जापान, रुस र दुई कोरिया छन् ।
