नयाँ चालक अनुमतिपत्र दुई महिनापछि मात्रै खुल्ने
काठमाडौँ । नयाँ सवारी चालक अनुमतिपत्र दुई महिनापछि मात्रै खुल्ने भएको छ । नौ महिनादेखि बन्द रहेको सेवा तत्काल खुलाउँदा धेरै सेवाग्राहीको भीड लाग्ने र सङ्क्रमण फैलनसक्ने भनी तत्काल नखुलाउने गरी छलफल अघि बढेको बताइएको छ ।
भौतिक पूर्वाधार तथा यातायात मन्त्रालय अन्र्तगतको यातायात व्यवस्था विभागले प्रदेश सरकारको भौतिक पूर्वाधार मन्त्रालयसँगको छलफलमा तत्काल खुलाउन नहुने भनी अझै केही महिना रोक्ने गरी योजना बनाइएको विभागका प्रवक्ता डा. लोकनाथ भुसालले बताएका छन् ।
विश्वव्यापी रुपमा फैलिएको कोभिड–१९ सङ्क्रमण नेपालमा समेत देखिन थालेपछि सरकारले गत चैतमा बन्दाबन्दी लागू गर्ने निर्णय गरेको थियो । चार महिनासम्म ठप्प भएको सरकारी कार्यालय असारमा मात्रै खुलेका थिए । असारमा यातायात कार्यालयले नवीकरण र वितरण शुरु गरे पनि नयाँ चालक अनुमतिपत्रका लागि परीक्षा लिएका छैनन् ।
