‘भावनात्मक अभिव्यक्ति दिएर नेता-कार्यकर्ता तान्ने दाउमा ओली’
काठमाडौं । प्रधानमन्त्री केपी शर्मा ओलीले सोमबार पोखरा आयोजित कार्यक्रममा आफू असुरक्षित रहेको अभिव्यक्ति दिएका थिए । प्रधानमन्त्री ओलीको पछिल्लो अभिव्यक्ति राजनीतिक फाइदा लिने उद्देश्यले पनि आएको हुन सक्ने एकथरीको विश्लेषण छ ।
राजनीतिशास्त्री कृष्ण पोखरेलको बुझाइमा सहानुभूति बटुल्न र नेकपाको प्रचण्ड- नेपाल समूहका नेता, कार्यकर्तालाई आफूतिर तान्ने उद्देश्यका साथ प्रधानमन्त्रीले त्यस्तो अभिव्यक्ति दिएको हुन सक्छ ।
‘ओलीको भावनात्मक अभिव्यक्ति राजनीतिक स्टन्ट र जनताबाट सहानुभूति बटुल्ने उपाय मात्र’
उनको विचारमा यो एक प्रकारको राजनीतिक स्टन्ट र जनताबाट सहानुभूति बटुल्ने उपाय मात्र हो ।
आफूले वाचा गरेअनुरूप विकास र सुशासनको दिशामा खासै प्रगति नदेखिएको पृष्ठभूमिमा आमनागरिकको ध्यान अन्यत्र मोड्ने हिसाबले पनि प्रधानमन्त्रीको त्यस्तो अभिव्यक्ति आएको हुन सक्ने एकथरीको बुझाइ छ ।
त्यसबारे पोखरेल भन्छन्, ‘म आफैँमाथि खतरा छ म मरे पनि मेरा मुद्दालाई अगाडि बढाउनुहोला भन्ने ढङ्गले बहसलाई अन्तै मोड्ने पनि हुन सक्छ । तर यी कुराबाट मानिसहरू भ्रमित हुने अवस्था अब छैन ।’
