परोपकार महिला साकोसद्वारा सञ्चालित ब्युटिसियन तालिम सम्पन्न

प्रकाशित मिति : १८ चैत्र २०७७, बुधबार

दोलखा । जिल्लाको भीमेश्वर नगरपालिकाको समन्वयमा परोपकार महिला साकोसद्वारा सञ्चालित आधारभूत तीन महिने ‘ब्युटिपार्लर तालिम’को सम्पन्न भएको छ ।

संस्थाकी अध्यक्ष शर्मिला सापकोटाको अध्यक्षतामा तथा भीमेश्वर नगरपालिका उप-प्रमुख कमला बस्नेतको प्रमुख आतिथ्यतामा सम्पन्न कार्यक्रममा तालिमकासहभागीहरूलाई प्रमाण पत्र वितरण गरिएको थियो । तालिममा १० जना सहभागि रहेको बताइएको छ ।

कार्यक्रममा सहभागीको तर्फबाट खेलमाया थामी, प्रशिक्षक लक्ष्मी श्रेष्ठ, प्रमुख अतिथि उप-प्रमुख कमला बस्नेतले मन्तव्य राख्नु भएको थियो । सहभागीलाई व्यवसायी बन्न र संस्थालाई यस्ता खालका कार्यक्रम गर्न भीमेश्वर नगरपालिकाले निरन्तर समन्वय र सहयोग गरिरहने प्रमुख अतिथि बस्नेतले बताउनु भयो ।

संस्थाका सदस्यहरूलाई सीपमा दक्ष बनाई, व्यवसायमा लाग्न प्रेरित गर्दै आयआर्जन गरि आर्थिक विकास गर्ने र आत्मनिर्भर बनाउन संस्थाले सहभागीहरूलाई आवश्यक सहयोग गर्ने संस्थाकी अध्यक्ष शर्मिला सापकोटाले बताउनु भएको थियो । संस्थाका सञ्चालक समित, लेखा समिति र कर्मचारी सहितको सहभागीता रहेको उक्त कार्यक्रमको सञ्चालन संस्थाकी सचिव अप्सरा चौलागाईले गर्नु भएको थियो ।