प्रधानमन्त्रीको जिल्ला ‘झापा’मा मौलायो यौनधन्दा

प्रकाशित मिति : १८ चैत्र २०७७, बुधबार

झापा । प्रधानमन्त्री केपी शर्मा ओलीको गृह जिल्ला झापामा यौन ब्यापार मौलाउँदै गएको छ । कामको खोजीमा आएका युवतीहरुलाई बन्धक बनाई यौनधन्दा चलाएको आरोपमा दमकबाट नेपाल प्रहरीले दुईजना महिला समातेको छ ।
प्रहरीले घटनास्थलबाट १७ देखि ३९ वर्ष उमेर समूहका आठजना युवतीलाई उद्धार गरेसँगै यौन धन्दा हुने गरेको पाइएको हो ।
जिल्ला प्रहरी कार्यालय झापाका डिएसपी राकेश थापाका अनुसार बन्धक बनाएर यौन धन्दा चलाएको आरोपमा मोरङ पथरी शनिश्चरे नगरपालिका-३ की ३८ वर्षीया उर्मिला नेम्बाङ र इलामको चुलाचुली गाउँपालिका-४ की ३८ वर्षीया बन्ठी भन्ने नन्दिता साँवा लिम्बुलाई पक्राउ गरिएको छ ।
दमक नगरपालिका-६ स्थित नयाँ सब्जी मन्डीमा घर भाडामा लिएर युवतीहरूलाई बन्धक बनाई यौनधन्दा चलाउँदै आएको प्रहरीको भनाइ छ ।
पीडित महिलाहरूले आफूहरु कामको खोजीमा दमक आएको र काम दिन्छु भनी बन्धक बनाएर यौन शोषण गराउँदै आएको बयान दिएको प्रहरीले बताएको छ । उद्धार गरिएका युवती तथा महिलाहरूलाई झापा जिल्ला अदालत भद्रपुरमा पेश गरी आफन्तजनलाई जिम्मा लगाइसकेको बताइएको छ ।
पक्राउ परेका नेम्बाङ र लिम्बुलाई मानव बेचबिखनसम्बन्धी मुद्दा दर्ता गरी अदालतबाट म्याद थपेर कानुनी प्रक्रिया अघि बढाइएको डिएसपी थापाले बताए ।