शनिबार २,६२४ जनामा कोरोनाभाइरस संक्रमण, २० को मृत्यु

प्रकाशित मिति : ३० श्रावण २०७८, शनिबार

काठमाडौं । नेपालमा शनिबार थप २,६२४ जनामा कोरोनाभाइरस सङ्क्रमण पुष्टि भएको र २० जनाको कोभिड-१९ का कारणले मृत्यु भएको स्वास्थ्य तथा जनसंख्या मन्त्रालयले जनाएको छ ।
यससँगै नेपालमा संक्रमितको कुल संख्या आठ लाख पाँच हजार नाघेको छ भने मृतकको संख्या १०,२५९ पुगेको छ ।
गत २४ घण्टामा २१ देखि ३० वर्ष उमेर समूहका ४७७ जना तुलनात्मक रूपमा सबभन्दा बढी संख्यामा संक्रमित बनेको स्वास्थ्य मन्त्रालयको तथ्याङ्कले देखाउँछ ।
संक्रमित हुने दोस्रो ठूलो संख्याको उमेर समूह ३१ देखि ४० को रहेको छ। उनीहरूको संख्या ४५१ रहेको छ । शनिवार अपराह्ण सार्वजनिक तथ्याङ्कअनुसार विगत २४ घण्टामा १३,५७३ जनाको परीक्षण गर्दा त्यति संख्यामा संक्रमण पुष्टि भएको हो ।
तीमध्ये ४,९०६ जनाको परीक्षण एन्टिजन विधिबाट र अरूको पीसीआर विधिबाट गरिएको हो ।
मन्त्रालयका अनुसार विगत २४ घण्टाको अवधिमा १,३२० जना संक्रमणमुक्त भएका छन् ।
संक्रमितमध्ये ३६,००० भन्दा बढी घरमा तथा ३,४०० भन्दा बढी संस्थागत आइसोलेशनमा छन् ।
अहिले ७६० जना देशभरिका विभिन्न अस्पतालका आईसीयूमा र १८६ जना भेन्टिलेटरमा छन् ।