दशैंका लागि मुस्ताङबाट हिडे च्याङ्ग्रा

प्रकाशित मिति : २९ आश्विन २०७७, बिहिबार

काठमाडौं । कोभिड–१९ का कारण तिब्बतबाट च्यांग्रा ल्याउन नपाएपछि दशैंमा मुस्ताङ्गे च्यांग्राको भाउ महंगिएको छ ।
एउटै च्यांग्राको भाउ प्रतिगोटामै ५ देखि ७ हजारसम्मले महंगिएको प्रधानमन्त्री कृषि आधुनिकीकरण परियोजना कार्यान्वयन इकाई कार्यालय मुस्ताङले जनाएको छ । गत वर्ष किसानले २२ हजार प्रतिगोटामा बिक्री गरेको च्यांग्राको भाउ यसपटक २७ हजार भन्दामाथि पुगेको बताएको छ ।
मूल थलोमै महंगो भएपछि बजारमा च्यांग्राको भाउ अझै बढ्न सक्ने अनुमान गरिएको छ । बिहीबारसम्म यसवर्ष मुस्ताङमा हुर्केका जम्मा ६ हजार च्यांग्रा बिक्रीका लागि पठाइएको छ ।
सामान्य अवस्थामा व्यापारीहरुले दशैंलाई लक्षित गर्दै तिब्बतबाट च्यांग्रा ल्याउने गरेकोमा यस वर्ष कोभिड–१९ कारण यस्तो हुन नसकेको हो ।