‘भारतमा नयाँ कोरोना संक्रमित संख्या घट्दै’

प्रकाशित मिति : १७ जेष्ठ २०७८, सोमबार

काठमाडौं । भारतमा कोरोना भाइरसबाट दैनिक संक्रमित हुनेको संख्या कम हुँदै डेढ लाखको हाराहारीमा आएको छ ।
भारतको केन्द्रीय स्वास्थ्य मन्त्रालयका अनुसार पछिल्लो २४ घण्टामा एक लाख ५२ हजार ७३४ जना नयाँ संक्रमित थपिएका छन् । सो अवधिमा कोभिड-१९ बाट तीन हजार १२८ जनाको ज्यान गएको छ ।
स्वास्थ्य मन्त्रालयको तथ्यांक अनुसार संक्रमितको संख्या कम हुँदै गए पनि मृत्यु हुनेको संख्या भने लगभग स्थिर जस्तै छ ।
अहिले भारतमा २० लाख २६ हजार भन्दा धेरै संक्रिय संक्रमित छन् । कुल संक्रमितको संख्या दुई करोड ८० लाख तथा कोभिड-१९ बाट मृत्यु हुनेको कुल संख्या तीन लाख २९ हजार भन्दा धेरै पुगेको छ ।
भारतमा अहिलेसम्म २१ करोड ३१ लाख भन्दा धेरैले कोरोना भाइरसविरुद्धको खोपको कम्तीमा एक मात्रा लगाएका छन् ।