‘कोभिडका कारण नन-कोभिड बिरामीको उपचार प्रभावित’

प्रकाशित मिति : २४ जेष्ठ २०७८, सोमबार

काठमाडौं । नेपालमा कोरोना भाइरसको दोस्रो लहर फैलिएपछि अस्पतालहरु कोरोनाका बिरामीले भरिभराऊ छन् ।
कोरोनाभाइरस संक्रमणको दोस्रो लहरका कारण देशभरका अस्पतालले कोभिड बिरामीको उपचारमा ध्यान दिएको र देशका अधिकांश जिल्लामा निषेधाज्ञा जारी रहेका बेला दीर्घ रोगी तथा अन्य बिरामीले भने नियमित स्वास्थ्य सेवा पाउन सकेका छैनन् ।
खास गरी मधुमेह, उच्च रक्तचाप, मुटु, क्यान्सर र मिर्गौला रोगीहरू प्रत्यक्ष मारमा परेको बताइएको छ ।
नियमित रूपमा चिकित्सक भेट्न नपाएका गर्भवती महिलाहरूले पनि निकै सकस बेहोर्नु परेको बताएका छन् ।
तर स्वास्थ्य मन्त्रालयका अधिकारीहरूले भने कुनै पनि अस्पतालमा अन्य रोगीहरूको उपचार सेवा नरोकिएको दाबी गरेका छन् ।