‘अन्तर्राष्ट्रिय हवाई उडान नियमित गर्दा पनि भाडा महँगो !’

प्रकाशित मिति : १ श्रावण २०७८, शुक्रबार

काठमाडौं । नेपालमा अन्तर्राष्ट्रिय उडान चार्टर्डबाट नियमित बनाइए पनि अहिलेको भाडा दर सामान्यभन्दा दुईगुना महँगो भएको पाइएको छ ।
युरोप वा अमेरिका जाने उडानको भाडा अहिलेसम्म दोबर महँगो छ भने नेपालीहरू वैदेशिक रोजगारीमा जाने खाडी मुलुकमा तेबरभन्दा महँगो भएको गुनासोहरु आइरहेका छन् ।
चार्टर्ड उडान बन्द गरेर नियमित उडान सञ्चालनमा आए पनि भाडा साबिकबाट दोबरभन्दा घटेको छैन ।
खाडी मुलुक जाने कामदारको हकमा उडान भाडा झन् बढी छ र त्यस्ता मुलुकमा जाने कामदारहरु मारमा परेका छन् ।
खासगरी कतार, दुबई र साउदी अरबमा कामदारका रूपमा धेरै नेपालीहरू गइरहेका छन् ।
त्यहाँको सरकारले तोकेको होटलमा अनिवार्य क्वारन्टीन बस्नुपर्ने नियम राखिदिएपछि कामदारहरू मारमा परेको बताइन्छ ।